شعرترکی برای یتیم

شعرترکی برای یتیم

گون مغربه گئدنده پریشان اولار یتیم

باد سحر دگنده هراسان اولار یتیم

بوینون اگوب بنفشه کیمی چیگنینه قویار

ابر بهار تک ولی گریان اولار یتیم

بنذر او غنچیه گل آچان وقتیده صولا

آفت یلی قروب سالا یا شاخه دن یولا

سیره چخار اورک آچیلا بلکه شاد اولا

تای توشلارین گورنده پشیمان اولار یتیم

بی مهر و بی علاقه گورر یار و یولداشین

کیپریکلری توکر یوزه حسرتله گوز یاشین

غم گوشه سینده غم دیزی اوسته قویار باشین

شمع شبانه تک ولی سوزان اولار یتیم

جرأتله قلبینون ائده بُلمز سوزون ادا

تاب ایلمز آجقلی سوزه تئز قیلار نوا

هئچ کیمسیه قوشولماز اولار غمله آشنا

فکر عالمینده دائمی حیران اولار یتیم

شاعرمرحوم انوراردبیلی